hinihintay ko bang sambitin mo
ang matamis mong pagmamahal?
inaasam ko bang marinig
ang mga katagang magpapatotoo?
hanggang kailan ka ba maniniwalang
hindi simpleng hamon ang hinaharap ko
na hindi kita sinusubukan
at hindi na ako naglalaro
hanggang kailan mo ba ako aakusahang
ang pagmamahal ko ay imbento lamang
para may mapatunayan, kanino?
sa sarili ko at sa iba? para ano?
hindi ako nagaabang sa mga sasabihin mo
hindi ko kailangan ang mga palabok na ito
kailangan ko ay ang mga mensahe ng kilos mo
mga matang nangungusap ang hinahanap ko
aanhin ko ang mga salita
aanhin ko ang mga pangako
maglalaho ang lahat ng ito
tanging mananatili ay ang puso
suriin mo nga ang sarili mo
ako ba ang nagaabang sa mga ito
o ikaw ang nangangailangan ng mga patunay
upang sa huli maniwala kang ako ay tunay
sana sa panahong handa ka nang tumaya
sana sa panahong hindi ka na takot pa
sana may buhay pa rin ang puso ko
para tanggapin ang pag-ibig mo
maghihintay ako
huwag lang kung mismong
ang tibok nitong puso
ang mapigtas at sumuko...
No comments:
Post a Comment